Nakalas ang batan-ong lalaki samtang duha pa ang naangol human giataki samtang nangatulog sulod sa ilang balay sa Barangay Owak, Asturias, Sugbo sa kagahapon sa Hulyo 2, 2025. Ang atake nahitabo pasado alas 4:30 sa buntag nga misangpot sa kalit nga kagubot sa ilang komunidad.
Ang napatay giila nga si Kyle Padilla, 18 anyos, samtang ang duha niyang manghod nga sila Gerald Steven, 10, ug Princess, 8 anyos, kasamtangang giatiman sa tambalanan tungod sa samad nga ilang naangkon. Silang tulo gituohang gipaningbas sa usa ka paryente nga kalit lang misulod sa ilang panimalay.
Gidakop dayon ang giingong suspek nga si George Batomalaque, 46 anyos, uyuan sa mga biktima, taga Balamban, Sugbo.
Base sa imbestigasyon, wala nay estorya pa nga nahitabo sa taliwala sa suspek ug mga biktima. Kalit lang kini misulod ug midiretso og panigbas gamit ang 12-pulgadang sundang samtang ang mga biktima natulog pa. Bisan samaran, ang 8 anyos nga si Princess nakabangon ug nakapangayo og tabang sa mga silingan.
Ang mga biktima giluwas dayon sa mga responding nga silingan ug Asturias Emergency Response Team ug gidala sa Balamban Provincial Hospital. Hangtod karon, padayon pa ang imbestigasyon aron masuta ang motibo sa brutal nga pag-atake.
I via Renante Socia Lada