Nakalas ang usa ka lalaki ug naangol ang iyang backride sa ilang gihimo nga joy ride.
Didto kini sa Transcentral Highway, Barangay Cansomoroy, Lungsod sa Balamban, Probinsya sa Sugbo, niadtong Dominggo sa kadlawon, Nobyembre 13, 2022.
Ang biktima nga nakabsan sa iyang kinabuhi mao si Jayson Lopez Saison, 24 anyos ang panuigon, taga Barangay Babag, Siyudad sa Sugbo.
Naangol usab ang iyang angkas nga si Ma.Catrina Tampus nga lumad nga taga Dakbayan sa Ormoc.
Sa gihimo nga inbestigasyon sa Balamban Police Station nasayran nga nanglaag ang mga biktima agi sa maong lugar luwan sa usa ka motorsiklo.
Apan pag abot na sa naasoy nga lugar sa kurbadahon nga bahin sa karsada nawad-an sa kontrol si Saison nga maoy hinungdan nga na deretso kini sa kilid nga bahin karsada.
Sa kakusog sa dagan nabugtuan gyud sa kinabuhi ang biktima nga wala na kaabot sa tambalan.
(Renante Lada, photo courtesy by Royce Dulogin)
