Nikalas og usa ka kinabuhi ug niangol og tulo ka mga tawo ang nahitabong panang bangga sa duha ka motorsiklo.
Pasado alas 4:00 kagahapon sa hapon, Oktobre 12, 2022, didto kini nahitabo sa National Highway, Brgy. Cogon East, Lungsod sa Carmen, Probinsya sa Sugbo.
Giila sa Carmen Police Station ang namatay nga si Jun Ray Misterio, hingkod ang pangidaron, residenti sa Bario Pikas Luyang, sa mao ra nga lungsod.
Ang mga naangol nga luwan sa kabangga nga motorsiklo mao sila si Nelia Grace Enriquez, 31 anyos ang panuigon, Driver, Jofhel Bernejo,22 anyos ug Maoren Pablio, 22 ang pangidaron, puros sila nagpuyo sa maong lungsod.
Sa gihimo nga imbestigasyon sa Carmen PS nasayran nga si Enriquez kalit mitabok sa maong lugar nga ni resulta sa ilang panang bangga.
Sa kakusog sa maong panag dasmag nalagpot ang mga sakay niini og nahampak ang ulo ni Misterio nga maoy hinungdan sa iyang hinalaling kamatayon.
Daling ni respondi ang mga sakop sa Carmen MDRRMO apan nabugtuan gyud sa kinabuhi si Misterio.
Sa pagkakaron gihimo pa ang panagsabot-sabot sa duha ka mga habig og giandam usab sa kapulisan ang tukmang kaso kung mupasaka gyud sa kaso ang tagtungod sa namatay. (Renante Lada, photo courtesy of Carmen Police Station)