Usa ka makasaysayanong nahitabo kagahapong adlawa, Mayo 2, 2025, sa Isla sa Camotes human sa malampuson nga pag-landing sa unang eroplano sa bag-ong Camotes Airport.
Alas 12:36 sa udto, milanding ang Piper Turbo Navajo RP-C 6002 sa runway isip kabahin sa opisyal nga runway inspection.
Ang maong kalihukan gihimo aron masusi ang kalidad ug kaluwasan sa runway sa wala pa ang full operation sa maong airport. Gidumala kini sa Civil Aviation Authority of the Philippines (CAAP), uban sa suporta sa lokal nga panggamhanan sa San Francisco, Camotes.
Ang runway inspection usa ka importante nga lakang sa proseso sa pag-operate sa usa ka airport. Kung kini maaprubahan, magpasabot kini nga andam na ang tugpahanan sa pagdawat og regular nga mga biyahe, nga magpadali sa transportasyon, turismo, ug negosyo sa isla.
Si Mayor Alfredo Arquillano Jr. sa San Francisco, Camotes, mitaho nga ang airport maghatag og dagkong oportunidad sa ekonomiya, edukasyon, ug medikal nga access para sa mga taga-Camotes.
Gilauman nga sa mosunod nga mga bulan, magsugod na ang operasyon sa Camotes Airport alang sa pipila ka test flights ug soft opening. Ang airport nahimutang sa lungsod sa San Francisco, ug kini gilauman nga mahimong sentro sa turismo ug pagkonektar sa mga isla sa Visayas.
I via Renante Socia Lada