Nahimo’ng sentro sa dakong kabalaka ug pangutana ang usa ka tugkaran sa panimalay sa Purok 10, Sitio Lubas 1, Barangay Campo 7, Minglanilla human makit-an ang ulo sa usa ka bag-ong natawo nga bata nga gikuha sa usa ka itoy pasado alas 2:00 sa hapon sa Lunes, Enero 5, 2025.
Si Joecio Obcial, nailhan sa bansagon nga “Judy,” maoy unang nakakita sa maong ulo. Matod niya, sa sinugdanan nagtuo siya nga ulo ra kini sa monyeka, apan nakamatikod siya nga nagkadugo kini sa dihang misuway pagsaka ang itoy nga nagdala niini padulong sa gawas sa ilang balay.
Human masuta nga dili kini dulaan kundili tinuod nga ulo sa bag-ong natawo nga gituohang batang babaye, dali gibadlong ni Judy ang itoy aron buhian ang gidala niini. Dayon ilang gipahibalo ang mga silingan ug ig-agaw ug gisugdan ang pagpangita sa lawas sa bata, apan wala gyud kini makit-i sa palibot.
Nakapukaw kini og dakong katingala sa mga residente tungod kay wala silay nahibaloan nga dunay nagmabdos sa ilang lugar. Usa sa ilang gidudahan mao ang usa ka puti nga sakyanan nga, sumala sa mga silingan, nag-park duol sa poste atbang sa balay sa magtiayong Obcial niadtong Domingo sa hapon, bisan pa man wala kini dayong gihatagan og pagtagad sa mga nanimuyo sa lugar.
Hangtod karon, nagpabiling tanhaga alang sa komunidad kon kinsa ang inahan sa bata ug unsa gyud ang tinuod nga nahitabo. Nagpaabot ang mga residente nga masayran na ang kamatuoran ug mahatagan og hustisya ang bata pinaagi sa husto nga imbestigasyon sa mga otoridad.
📸 CTTO
I via Renante Socia Lada