Segon sa Cebu City PIO nga tulo ka mga centenarian, o mga nakaabot sa edad nga 100, ang nakadawat sa ilang cash incentive kagahapong adlawa, Nobiyembre 12, 2024 gikan sa kagamhanan sa dakbayan sa Sugbo.
Gipangunayan ni Mayor Raymond Alvin Garcia ang pagtunol sa ilang mga tseke, kauban si Chito Aragon, nga executive director sa Office of the Senior Citizens Affairs, ug mga sakop sa Department of Social Welfare and Services.
Unang giadto ni Mayor Garcia si Eufemia Sarusad Labado,101, taga-Sitio Tubod, Barangay Bulacao, siyudad sa Sugbo. Nagsaulog siya sa ika-101 nga adlaw’ng natawhan niadtong Septiyembre 14.
Adunay 12 ka mga anak si lola Eufemia ug kapin 50 ka mga apo. Kauban niya sa ilang balay ang iyang bana nga si Rufino Labado, nga nagpangidaron na karon og 104 anyos.
Pulong ni lola Eufemia, wala siya gimintinar nga tambal ug wala siyay pili sa iyang kanoon matag adlaw. Gitug-an hinuoon sa usa niya ka anak nga ang iyang mga ginikanan kada adlaw nga anaa sa ilang gamay nga umahan sa Sitio Tubod.
“When I grow old I want to be like you,” pangomedya pa ni Mayor Garcia ngadto kang lola Eufemia.
Sunod nga gitunolan sa mayor og tseke mao si Francisca Aboitiz, sa pinuy-anan niini sa 18-0 Elizabeth Pond sa Barangay Camputhaw ning siyudad.
Si Mayor Garcia lamang ang gitugtan nga makapahulagway kaniya human sa ilang hamubo nga panag-istorya.
Ang katapusan nga centenarian nga gitunolan og tseke ni Mayor Garcia mao ang usa ka retiradong empleyado sa Commission on Audit nga si Erdelinda Salazar, diha sa pinuy-anan niini sa dalan D. Jakosalem, Barangay San Antonio ning siyudad.
Ang iyang bana nagtrabaho kaniadto sa City Assessors Office sa Cebu City Hall sulod sa kapin 30 ka mga tuig.
Anaa karon nagpuyo si lola Erdelinda kauban sa iyang anak babaye. Aduna siyay laing duha pa ka mga anak apan kini pulos nitaliwan na. (Renante Socia Lada)
(Source: Cebu City PIO)