Usa ka trahedya ang nahitabo sa Barangay Malabuhan, Siaton kagabii, Dominggo, Agosto 24, human magbangga ang duha ka motorsiklo nga miresulta sa pagkamatay sa tulo ka mga tawo, apil na ang usa ka maestro.
Giila ang biktima nga maestro si Rolly Palagtiw, ulitawo ug magtutudlo sa usa ka Adventist school, nga nagpuyo sa Sitio Candugay, Barangay Casaalan. Nagmaneho siya sa iyang blue Yamaha Sniper 150 paingon sa Bayawan City dihang nabanggaan sa usa ka red Skygo 125 nga gikaangkasan ni Yoyo Aquino Paira ug James Megio, nga pareho usab nga residente sa Brgy. Casaalan.
Base sa inisyal nga imbestigasyon, sakto ra sa iyang lane si Palagtiw apan nakasugat siya sa Skygo nga giingong na-overshoot human kini mo-overtake ug laing sakyanan.
Gidala pa ang tanang biktima sa Siaton Rescue Team ngadto sa Congressman Lamberto L. Macias Memorial Hospital, apan pag-abot didto gideklarar silang dead on arrival (DOA) sa mga doktor.
Padayon pa ang imbestigasyon sa kapulisan sa hinungdan sa aksidente nga nikutlo og mga kinabuhi.
I via Renante Socia Lada