Nadakpan sayo sa buntag, Lunes, Agosto 25, ang usa ka 18-anyos nga estudyante human gipasanginlang nanghilabot sa pribadong parte sa lawas sa usa ka 20-anyos nga dalaga sulod sa usa ka bar sa siyudad sa Sugbo.
Ang suspek nailhan lamang sa alyas nga Geoff C., residente sa Brgy. Maguikay, Mandaue City. Samtang ang biktima gitawag sa alyas nga “Kesha”, lumad nga taga-Dalaguete apan kasamtangan nga nagpuyo sa usa ka boarding house sa Barangay Sambag 1.
Base sa inisyal nga imbestigasyon, nahitabo ang insidente pasado alas-4:00 sa kadlawon sulod sa Agwa Bar sa Waterfront Drive, Barangay Lahug. Gisumbong sa biktima sa club bouncer ang gihimo sa suspek, hinungdan nga kini dali nga gidakop pinaagi sa citizen’s arrest.
Ang suspek gihatod dayon ngadto sa Mabolo Police Station aron atubangon ang kaso. Giandam na batok kaniya ang reklamo nga Acts of Lasciviousness.
Matud pa sa kapulisan, ang suspetsado usa usab ka musikero. Sa pagkakaron, padayon ang imbestigasyon samtang nagpaabot sa pormal nga reklamo ang mga awtoridad.
I via Renante Socia Lada