Sa sulod sa lima ka bulan, dako na og kausaban ang nabati sa Tuburan District Hospital human gi-tutokan ang mga batakang problema sa operasyon sa ospital. Sumala kang Capitol Health Consultant Dr. Nikki Catalan, klaro na karon ang pag-uswag sa serbisyo ug pagdagsa sa mga pasyente.
Ubos sa pagpanguna ni Chief of Hospital Dr. Brian Vilbar, gisulbad ang mga mahinungdanong isyu sama sa kulang nga suplay sa central supply, paglimpyo ug paghan-ay sa palibot sa ospital, ug problema sa baha sa likod nga bahin sa compound. Tungod niini, mas nindot na ang kahimtangan sa trabaho ug mas nisaka ang pagsalig sa mga pasyente.
Matod pa ni Dr. Catalan, bisan ginagmay tan-awon ang maong mga kausaban, importante kaayo kini sa usa ka ospital kay mao kini ang pundasyon sa hapsay nga serbisyo, kaluwasan, ug kahimsog sa mga pasyente ug kawani.
Tungod sa mga kausaban, misaka ang ihap sa mga pasyente matag adlaw—gikan sa una nga 5 hangtod 10, karon miabot na og mga 50 ka pasyente. Nagpasabot kini nga mas daghan na ang mosalig ug mopili sa serbisyo sa maong ospital.
Misugod na usab og kalig-on ang kahimtangan sa panalapi sa ospital tungod sa mas hapsay nga pagproseso sa PhilHealth ug mas maayong kita. Mas daghan na usab ang mga doktor nga interesado motrabaho sa ospital, nga kaniadto giisip nga naglisod.
Bisan pa man nga naghulat pa ang ospital sa opisyal nga bidding ug pagtukod sa dugang pasilidad, klaro nga ang mga kausaban sa adlaw-adlaw nga operasyon dako na og tabang. Gidayeg ni Dr. Catalan si Dr. Vilbar ug iyang team sa ilang maayong pagpanguna ug paningkamot para sa kaayohan sa Tuburan District Hospital.
Source: Cebu Province PIO
I via Renante Socia Lada