Pormal nang gilusad sa Cebu Provincial Government ang bag-ong gi-renovate nga studio sa Provincial Information Office (PIO) nga gamiton isip lugar sa mga talk show sa Kapitolyo. Tumong niini nga mas mahatagan og hustong impormasyon ang publiko ug mapalalom ang transparency sa pangdumala ni Gobernador Pamela Baricuatro.
Ang paglusad gisugdan sa usa ka panalangin alang sa studio ug sa mga kaubang pasilidad, nga gipangulohan ni Provincial Administrator Atty. Ace Durano ug Capitol Piso Health Consultant Dr. Nikki Catalan. Mitambong usab ang mga hepe sa nagkalain-laing departamento sa Kapitolyo.
Lakip sa unang mga programa ang “Dok iStorya,” usa ka talk show nga maghisgot sa mga isyu sa panglawas ug serbisyong medikal sa probinsya. Kini gi-host ni Board Member Doc Stanley Caminero ug Dr. Nikki Catalan.
Isa pa ka programa mao ang “iStorya Cebu,” nga gi-host sa PIO Chief Ainjeliz de la Torre-Orong. Dinhi ipaila ang mga proyekto ug programa sa Kapitolyo pinaagi sa mga opisyal ug department heads sa probinsya.
Gilauman nga motungha sa mga programa si Gob. Baricuatro, Vice Gov. Glenn Soco, mga myembro sa Provincial Board, department heads, lakip na ang mga lokal nga lider ug opisyal sa national agencies. Ang mga talk show makita eksklusibo sa opisyal nga Facebook page sa Capitol.
Source: Cebu Province PIO
I via Renante Socia Lada