Nasikop ang usa ka Top 9 Most Wanted Person sa lebel probinsya ug Top 2 sa lebel munisipyo atol sa hiniusang operasyon sa kapulisan niadtong Marso 17, 2026 sa Purok 3A, Barangay Lingig, Surigao del Sur.
Ang suspek, nailhan lamang sa angga nga “Cio,” 45 anyos, minyo ug mananagat, nadakpan sa Tracker Team sa Tuburan Municipal Police uban sa mga pulis gikan sa Lingig Municipal Police Station.
Gibase sa warrant of arrest ang pagdakop batok sa kaso nga “Acts of Lasciviousness” ubos sa Section 5(b) sa Republic Act 7610, nga adunay piyansa nga ₱180,000. Giatubang usab sa suspek ang tulo ka kaso sa paglapas sa Section 10(a) sa maong balaod nga gisang-at pa niadtong 2023.
Matud sa kapulisan, ang operasyon resulta sa hugot nga intelihensya ug koordinasyon sa mga tracker team sa Tuburan ug Lingig nga mitultol sa pagkadakop sa suspek sa iyang temporaryong gipuy-an.
Gidayeg ni PCOL. Abubakar Udang Mangelen Jr., Provincial Director sa Cebu Police Provincial Office, ang mga operatiba sa ilang kalampusan. Sumala kaniya, nagpakita kini sa lig-on nga panagtinabangay ug padayon nga paningkamot sa kapulisan aron madakpan ang mga wanted person ug mapaatubang sa hustisya.
Source: CPPO
I via Renante Socia Lada