Nadakpan sa kapulisan ang Top 6 Most Wanted Person sa provincial level ug Top 3 Most Wanted Person sa municipal level atol sa usa ka intelligence-driven nga operasyon sa Talisay City, Cebu niadtong Marso 10, 2026.
Ang operasyon gihimo sa Cebu Police Provincial Office Provincial Intelligence Unit Tracker Team uban sa mga pulis sa Talisay City Police Station sa Barangay Candulawan nga misangpot sa pagdakop sa suspek nga nailhan sa alyas “Jason,” 34 anyos, residente sa Sitio Kamansi sa maong barangay.
Gisilbihan siya og warrant of arrest tungod sa duha ka kaso sa paglapas sa Section 5(b) sa Republic Act 7610. Ang warrant gi-isyu sa Regional Trial Court Family Court Branch 7 Talisay City ug adunay piyansa nga ₱200,000 matag kaso.
Base sa imbestigasyon, gipasanginlan ang suspek nga naghimo og malaw-ay nga buhat batok sa iyang menor de edad nga stepdaughter sulod sa ilang balay samtang wala ang inahan sa bata tungod sa trabaho.
Gisulti sa biktima ang nahitabo sa iyang inahan nga maoy nagreport sa kapulisan nga misangpot sa pagpasaka sa kaso.
Sumala ni PCIL. Abubakar Udang Mangelen Jr., provincial director sa Cebu Police Provincial Office, ang pagdakop nagpakita sa determinasyon sa kapulisan sa pagsikop sa mga wanted person ug pag-atubang kanila sa hustisya aron mapadayon ang kalinaw ug kaluwasan sa Cebu Province.
Source: CPPO
I via Renante Socia Lada