Nadakpan sa mga pulis ang usa ka Top 5 Most Wanted Person sa probinsyal lebel ug Top 1 Most Wanted sa lebel sa lungsod sa Dalaguete, Cebu niadtong Marso 18, 2026 sa Barangay Poblacion.
Ang nadakpan nailhan sa alias nga “Alo,” 37 anyos, ulitawo, ug residente sa Barangay Mantalongon sa maong lungsod.
Giatubang sa suspetsado ang kaso nga qualified rape ug lascivious conduct ubos sa Section 5(B) sa Republic Act 7610. Ang warrant of arrest gi-isyu sa Regional Trial Court Branch 93 sa Argao, Cebu.
Walay piyansa ang kasong qualified rape, samtang gitakda sa ₱200,000 ang piyansa alang sa lascivious conduct.
Base sa imbestigasyon, giingong gipangabuso sa suspek ang iyang menor de edad nga stepdaughter, hinungdan sa pagpasaka sa kaso uban sa tabang sa kapulisan sa Dalaguete.
Gidayeg ni PCOL Abubakar Udang Mangelen Jr., Provincial Director sa Cebu Police Provincial Office, ang mga operatiba sa ilang malampusong operasyon.
Matod pa niya, padayon ang ilang paningkamot sa pagdakop sa mga wanted person ilabina kadtong nakasala batok sa kabataan.
Gipasig-uli usab sa kapulisan nga ilang palig-onon ang kampanya batok sa kriminalidad aron masiguro ang hustisya ug kaluwasan sa komunidad.
Source: CPPO
I via Renante Socia