Nasikop sa lungsod sa Pilar, Bohol, niadtong Pebrero 13, 2025, ang ika-lima sa labing gipangita nga kriminal sa Central Visayas nga nag-atubang sa kaso sa pagpatay.
Ang pagdakop nahimong posible tungod sa hingpit nga koordinasyon tali sa lain-laing yunit sa kapulisan sa Police Regional Office 7. Pinangulohan sa Jagna Municipal Police Station (MPS), ang operasyon gitambongan usab sa Provincial Intelligence Team, Criminal Investigation and Detection Group (CIDG), Provincial Highway Patrol Team sa Bohol Police Provincial Office, ug sa Regional Intelligence Team 7.
Ang maong suspek gidakop pinaagi sa mando sa korte nga gipagula niadtong Pebrero 11, 2025, sa Regional Trial Court, 7th Judicial Region, Branch 50 sa Loay, Bohol. Wala kini girekomendahan og pyansa.
“This arrest marks a significant victory for law enforcement and for the safety of our community. We want to thank the dedicated officers, investigators, and agencies who worked tirelessly to ensure this individual is brought to justice. We also extend our gratitude to the public for their vigilance and assistance,”pamahayag ni Regional Director PBGEN REDRICO A. Maranan.
Sa pagkakaron, ang akusado gitanggong sa custodial facility sa CIDG-Bohol ug andam nang ipresentar sa korte nga nag-isyu sa maong mando. (Renante Socia Lada)
(Source: PRO7-PIO)