Nadakpan sa kapulisan sa Trinidad Municipal Police Station ang ika-lima sa listahan sa Most Wanted sa Bohol sa krimen nga Statutory Rape. Ang operasyon nahitabo niadtong Hunyo 20, 2025, alas 3:15 sa hapon sa Purok 2, Poblacion, Trinidad, Bohol.
Ang pagdakop gihimo sa Tracker Team sa Trinidad MPS pinasikad sa warrant of arrest nga gi-isyu sa Regional Trial Court Branch 52 sa Talibon, Bohol, niadtong Hunyo 16, 2025. Ang suspetsado giatubang og lima ka kaso sa Statutory Rape (RTC-TLB-25-7579 hangtod 7583) ug walay girekomendar nga piyansa.
Sumala sa balaod, ang krimen nga Statutory Rape giisip nga grabe kaayo nga krimen nga gibuhat batok sa usa ka bata nga ubos sa 12 anyos, bisan pa og adunay pagtugot, hulga, o paggamit og kusog. Ang silot niini mao ang 20 ka tuig ug 1 ka adlaw hangtod 40 ka tuig nga pagkabilanggo.
Human sa pagdakop, gidala ang suspetsado sa Trinidad MPS alang sa hustong dokumentasyon ug gi-undergo og medical check-up sa Trinidad Rural Health Unit. Gamit usab ang duha ka body-worn camera atol sa operasyon, subay sa patakaran sa Supreme Court aron maseguro ang transparency ug proteksyon sa katungod sa tanang partido.
Gipasidunggan ni PBGen Redrico A. Maranan, Regional Director sa PRO7, ang Trinidad MPS sa ilang kaisog ug pagpaningkamot. Matod niya, sa Bagong Pilipinas, walay makalikay sa balaod. Ang PRO7 magpadayon sa pagpanalipod sa katawhan ug pagsiguro nga ang tanang komunidad luwas.
Source: PRO7
I via Renante Socia Lada