Malampuson ang gipahigayon nga 24-oras nga anti-criminality operation sa Police Regional Office 7 (PRO7) gikan alas 6 sa buntag sa Hunyo 20 hangtod alas 5:59 sa buntag sa Hunyo 21, 2025. Sa maong operasyon, nakumpiskar ang kapin ₱1.1 milyon nga kantidad sa ilegal nga drogas, nadakpan ang 25 ka suspek, ug nadokumentohan ang 593 ka kalapasan sa mga lokal nga ordinansa sa Central Visayas.
Sa tibuok 25 ka drug bust operations, nasakmit ang 162.94 gramos nga shabu nga nagkantidad og ₱1,107,992.00. Pinakadako ang nasakmit sa Cebu City Police Office (CCPO) nga miabot og 104.54 gramos nga shabu nga nagkantidad og ₱710,872.00. Ang Bohol Police Provincial Office (BPPO) nakumpiska og 25.79 gramos nga nagkantidad og ₱175,372.00, samtang ang Cebu Police Provincial Office (CPPO) adunay 25.43 gramos nga shabu nga kantidad og ₱172,924.00.
Gawas sa mga drug-related arrests, nadakpan usab ang 18 ka wanted persons nga adunay mga warrant of arrest isip kabahin sa kampanya sa PRO7 batok sa mga kriminal. Tulo ka pusil nga walay lisensya ang nasakmit sa lain-laing operasyon nga makatabang sa pagsiguro sa kalinaw ug kahapsay sa rehiyon.
Nasuta isab sa operasyon ang 593 ka kalapasan sa mga lokal nga ordinansa sama sa curfew, loitering, smoking ban, ug traffic violations. Gipatuman usab ang mga balaod sama sa RA 4136 (Traffic Code), RA 10586 (Anti-Drunk and Drugged Driving Act), ug PD 96 (Pagdili sa paggamit sa sirena ug susamang device) ilawom sa road-clearing operations aron malikayan ang mga aksidente sa kalsada.
Matod ni PRO7 Regional Director PBGen Redrico A. Maranan, kini nga operasyon nagpakita sa paningkamot sa kapulisan nga magpabilin nga lig-on, paspas, ug matinud-anon sa serbisyo. Uban sa suporta sa Chief PNP nga si PGen Nicolas D. Torre III, magpadayon ang PRO7 sa pagpanalipod ug pagserbisyo sa katawhan sa Central Visayas.
Source: PRO7
I via Renante Socia Lada