Usa ka tinun-an sa kolehiyo ang namatay samtang usa ka delivery rider ang naangol sa aksidente sa motorsiklo nga nahitabo sa Hangar Road, Barangay Basak, Lapu-Lapu City. Nahitabo ang insidente pasado alas 3:10 sa kadlawon, Abril 5, 2025, naglambigit kini og duha ka motorsiklo.
Base sa imbestigasyon sa Traffic Enforcement Unit sa Lapu-Lapu City Police, nagkasugat ang 24-anyos nga estudyante ug ang 21-anyos nga delivery rider dihang giingong ni-counterflow ang estudyante. Tungod niini, nagkabangga ang ilang mga motorsiklo ug nalagpot sila padulong sa semento.
Ang motorsiklo sa estudyante mikaras pa padulong sa usa ka Isuzu Elf nga dropside truck nga naghunong sa kilid sa dalan. Human sa aksidente, dali gidala sa Lapu-Lapu District Hospital ang duha ka biktima, apan gideklarar nga dead on arrival ang estudyante samtang padayon nga giatiman ang delivery rider.
Sa pagkakaron, padayon ang imbestigasyon sa kapulisan aron matino ang tibuok detalye sa maong insidente.
Samtang gitambagan usab sa kapulisan ang mga motorista nga magmatngon ug sundon ang mga lagda sa trapiko aron malikayan ang susamang trahedya.
I via Renante Socia Lada