Nibisita sa nagkadaiyang cultural ug heritage sites sa Cebu City si Timor-Leste Prime Minister Xanana Gusmão niadtong Mayo 9 human sa pagtapos sa ika-48 nga ASEAN Summit nga gipahigayon sa Sugbo.
Lakip sa iyang gibisita ang Basilica Minore del Santo Niño de Cebu, Magellan’s Cross ug Fort San Pedro antes siya mibiya paingon balik sa Timor-Leste uban sa iyang delegasyon.
Mihapit usab si Gusmão sa Cebu City Hall diin gidawat siya sa mga opisyal sa siyudad nga gipangulohan nila Mayor Nestor Archival ug Tomas Osmeña, uban ni Fr. Albert Benedict Soliman sa Basilica Minore del Santo Niño.
Matud pa sa mga opisyal, isip usa ka debotong Katoliko, ang pagbisita ni Gusmão sa Basilica nagpakita sa lig-on nga relasyon ug parehas nga pagtuo sa Timor-Leste ug Pilipinas nga parehong nasud nga kadaghanang Katoliko sa Southeast Asia.
Samtang, miingon si Mayor Archival nga malinawon ug malampuson ang ASEAN Summit bisan adunay reklamo gikan sa pipila ka residente labi na sa Lapu-Lapu City tungod sa grabeng trapiko ug temporaryong pagsira sa mga dalan atol sa summit.
Nagpasalamat usab siya sa publiko tungod sa ilang pasensya ug kooperasyon.
Matud niya, napakita sa Cebu nga kaya niini ang pagdawat sa mga world leaders samtang gipadayon ang kalinaw ug kahapsay sa syudad.
Source: Cebu City PIO
I via Renante Socia Lada