Sa ikatulong sunod-sunod nga tuig, giila na usab ang Philippine Drug Enforcement Agency (PDEA) Regional Office 7 isip Best Performing Regional Office sa Alpha Cluster — grupo sa mga rehiyon nga taas og kaso sa drogas.
Ang maong pasidungog gitunol atol sa ika-23 nga anibersaryo sa PDEA nga gipahigayon sa Camp General Aguinaldo, Quezon City. Si Dir. II Alex M. Tablate, ang pa-biya nga Acting Regional Director sa PDEA-7, maoy midawat sa award nga gipirmahan mismo ni PDEA Director General Usec. Isagani R. Nerez.
Niadtong 2024, bisan kulang sa 200 ka empleyado, ang PDEA-7 nakakumpiskar og kapin 118 kilos nga shabu ug uban pang drogas nga nagkantidad og kapin ₱808 milyon. Kini resulta sa ilang mga operasyon kauban ang PNP ug uban pang ahensya.
Gawas pa niini, nakapahigayon usab ang PDEA-7 og duha ka drug destruction activities, diin kapin 126 kilos sa iligas drogas ang ilang giguba nga nagkantidad og kapin ₱864 milyon.
Kauban ang DILG-7, DOH-Central Visayas, ug PRO-7, ang PDEA-7 nakatabang sa pagdeklarar og 274 ka barangay ug usa ka lungsod nga drug-cleared. Nagpadayon usab sila sa paghatag og edukasyon sa komunidad ug tabang sa mga gustong magpa-rehab.
Gipasidunggan usab sa nasudnong lebel si Ms. Gail T. Frias, usa ka Communication and Equipment Operator sa PDEA-7, isip Best Rank and File Employee – 1st Level, nga nagpakita sa kalidad sa ilang mga kawani.
Kini nga kadaugan nagpamatuod sa padayon nga paningkamot ug dedikasyon sa PDEA-7 sa gubat batok sa iligal nga drogas dinhi sa Central Visayas.
Source: PDEA-7
I via Renante Socia Lada
#rpndykccebu