Giklaro ni Talisay City Mayor Samsam Gullas ang isyu kabahin sa gituohang “ghost project” nga nisikat sa social media human sa pag-viral sa usa ka video nga nagpangutana sa tinuod nga kahimtang niini sa Barangay Manipis.
Sumala sa mayor, ang proyekto dili under sa Talisay LGU apan sa Department of Public Works and Highways (DPWH) nga mao gyud ang implementing agency. Gituyo unta nga magtukod og alternate route gikan sa Sitio Campinsa paingon sa Manipis aron adunay laing agianan ang mga motorista kon adunay landslide sa Manipis road.
Apan, giingon sa DPWH nga nasuspenso ang proyekto tungod sa kakulangon sa Environmental Compliance Certificate (ECC) ug PAMB permit gikan sa DENR. Dunay sab mga isyu sa Road Right of Way nga kinahanglan una masulbad. Ang nakapalisod, wala gi-update ug gipahibaw ang Talisay LGU nga nasuspenso na diay ang maong proyekto.
Matud pa ni Mayor Gullas, mas maayo unta nga gibutangan og klarong pahibalo o tarpaulin nga suspended ang proyekto aron dili malibog ang katawhan, labi na kay adunay completion date nga gi-post.
“Gusto lang nako ipasabot sa tanan Talisaynon nga nadungog namo ang inyong mga pangutana ug kabalaka. Wala usab mi naglingkod lang, padayon ming naningkamot nga matubag ug masulbad ang inyong mga concerns,” dugang pa ni Gullas.
Source: Mayor Samsam Gullas
I via Renante Socia Lada