Nagpahibalo si Police Regional Director 7 PBGen Redrico A. Maranan nga dako na ang nahimo nga kalamboan sa kampanya batok sa iligal nga drogas sa Central Visayas, ilabina sa Barangay Drug Clearing Program (BDCP).
Base sa datos hangtod Agosto 28, 2025, adunay 1,603 ka barangay nga drug-cleared na ug 36 ka barangay nga drug-unaffected ang napamatud-an nga drug-free. Gikan sa 2,312 ka barangay sa rehiyon, 673 na lang ang naapektuhan sa drogas: 241 slight, 403 moderate, ug 29 serious. Kini nagpasabot nga 70.4% accomplishment rate ug ang drug affectation level sa rehiyon mikunhod na sa 29.1%.
Gikan Enero 1 hangtod Septiyembre 25, 2025, ang PRO7 nakahimo og 6,003 operasyon nga mitultol sa 6,995 ka nasikop. Nakuha niini ang kapin 111,948 gramos nga shabu nga nagkantidad og ₱761 milyon, marijuana nga nagkantidad og ₱3.1 milyon, 250 gramos nga cocaine nga nagkantidad og ₱1.3 milyon, ug 60 ka ecstasy tablets nga nagkantidad og ₱102,000.
Matud ni PBGen Maranan, dili lang kutob sa pagpangdakop ug pagpang-raid ang ilang kampanya. Apil usab niini ang awareness programs, edukasyon, rehabilitasyon, ug ang lig-on nga suporta sa komunidad.
Nag-awhag usab siya sa tanan sektor nga magpadayon sa pag alerto ug pagkahiusa aron mas mapaspas ang katumanan sa usa ka rehiyong gawas sa drogas.
Source: PRO7- PIO
I via Renante Socia Lada