Usa ka Taiwanese national ang patay nga nakit-an human kini gituhoang nahulog gikan sa ika-12 nga andana sa usa ka hotel nga nahimutang sa North Reclamation Area, Barangay Mabolo, Dakbayan sa Sugbo, atbang sa North Bus Terminal, pasado alas 1:00 sa kaadlawon, Lunes, Nobiyembre 25, 2024.
Ang biktima giila nga si Liu Wen-Feng, 52 anyos, usa ka construction inspector sa Bafang Engineering Corporation sa Taiwan, nga kasamtangang nagpuyo sa maong hotel.
Matod sa report gikan sa Mabolo Police Station, nadawat nila ang alarma alas 2:00 sa kaadlawon. Pag-abot nila sa lugar, ilang nakaplagan ang biktima nga wala nay kinabuhi sa kilid sa hotel.
Sa inisyal nga imbestigasyon, giingon sa PNP nga ang mga dispatcher sa North Bus Terminal maoy unang nakabantay sa nilagubo sa kilid sa hotel. Sa sinugdanan, ilang tuyo nga debris lang kini, apan sa ilang pagsusi, ilang nadiskobrehan nga usa kini ka tawo.
Tungod sa kataas sa iyang nahulog, nakaangkon ang biktima og grabe nga kadaot sa lawas nga hinungdan sa iyang kamatayon.
Nasayran nga ang biktima kauban sa usa ka grupo nga pulos mga Taiwanese nga kauban niya sa kompanya ug nag-check-in sa maong hotel aron mobisita sa Sugbo.
Padayon pa ang imbestigasyon sa kapulisan aron masuta kung adunay foul play sa kamatayon sa maong langyaw. (Renante Lada)