Nakahimo og kapin ₱9.8 milyon nga halin ang “Tabo sa Kapitolyo: Agri-Fisheries Trade Fair 2026” nga gipahigayon sulod sa usa ka semana sa Parking Lot sa Cebu Provincial Capitol.
Ang trade fair gihimo niadtong Agosto 3 hangtod 9 isip kabahin sa selebrasyon sa 457th Founding Anniversary sa Cebu. Mitambong niini ang 52 ka local government units (LGUs) ug 16 ka pribadong exhibitors, o mokabat sa 68 ka exhibitors.
Matod ni Cebu Provincial Agriculturist Dr. Roldan Saragena, dako ang natabang sa mas lapad ug mas accessible nga lugar, apan usa sa dakong hinungdan sa kalampusan sa kalihokan mao ang barato ug de-kalidad nga mga produkto. Lakip sa gipamaligya ang cassava products gikan sa Camotes, humba sa Ronda, Bisayang Manok, lechon, bulad gikan sa Bantayan, torta sa Argao, tuba ice cream sa Borbon, ug nagkalain-laing prutas ug utanon.
Sa kinatibuk-ang halin, kapin ₱7 milyon ang nakuha sa mga LGU exhibitors, samtang ₱2.8 milyon ang halin sa mga pribadong exhibitors. Nanguna ang Liloan nga adunay ₱442,569 nga halin, gisundan sa Tudela, Argao, Santa Fe ug Cordova.
Tungod sa kalampusan sa trade fair, gihagit ni Gov. Pamela Baricuatro ang Provincial Agriculture Office nga mag-andam og mas dako ug mas nindot nga trade fair alang sa Pasko sa Kapitolyo karong Disyembre.
I via Renante Socia Lada