Naapektuhan ang 26 ka pamilya o 77 ka indibidwal human sa sunog nga nahitabo sa Sitio Proper, Barangay Tisa, Cebu City, kagahapon sa hapon, Hulyo 21, 2026.
Base sa inisyal nga report sa Cebu City Disaster Risk Reduction and Management Office (CCDRRMO), upat ka balay ang nadamay sa sunog. Usa niini ang hingpit nga nasunog samtang tulo ang adunay partial damage. Ang tanang 26 ka pamilyang naapektuhan mga nag-abang lamang sa maong lugar.
Diha-diha dayon nga mihimo og assessment ang mga opisyal sa siyudad aron mahibal-an ang gidak-on sa kadaot ug ang tabang nga gikinahanglan sa mga biktima. Nagpadayon usab ang Cebu City Government sa pag-andam sa relief assistance alang sa mga napahawa sa ilang gipuy-an.
Miresponde ang Bureau of Fire Protection (BFP), CCDRRMO, ug uban pang mga ahensya aron mapalong ang kalayo ug masiguro ang kaluwasan sa mga residente sa palibot. Sa pasiunang imbestigasyon mikabat sa ₱4.5 milyon ang danyos sa maing sunog. Padayon pa usab ang imbestigasyon sa BFP aron matino ang hinungdan niini.
Samtang nagpadayon ang validation, gipasalig sa Cebu City Government nga mahatagan og hustong ayuda ang mga naapektuhan ug gipahinumdoman ang publiko sa kanunay nga pag-amping aron malikayan ang susamang insidente.
I via Renante Socia Lada