Nasakmit sa mga awtoridad ang kapin ₱27 milyon nga balor sa shabu sa Mactan Cebu International Airport (MCIA) niadtong Huwebes sa udto. Gidakop usab ang usa ka 32-anyos nga South African national nga nagdala sa mga kontrabando.
Matod sa Bureau of Customs (BOC) Port of Mactan Collector Gerardo Campo, natumbok sa x-ray inspection ang upat ka kilo nga shabu nga gitago sulod sa mga libro nga gikan sa Hong Kong.
Ang suspek mitug-an nga usa ra ka higala ang nagsugo kaniya sa pagdala sa mga libro ngadto sa Cebu aron ihatag sa lain pa ka tawo. Apan giingon niya nga wala siyay kalibutan nga adunay sulod kini nga iligal nga drogas. Karon, gipahimutang siya sa temporary detention samtang nagpadayon ang imbestigasyon.
Ang nakumpiskar nga drogas ipasa sa Philippine Drug Enforcement Agency (PDEA) alang sa tukmang disposisyon ug case build-up.
Si Lapu-Lapu City Mayor Cindi King-Chan personal nga mitan-aw sa operasyon ug mipasidungog sa Customs ug airport authorities sa ilang paspas nga aksyon.
Giklaro usab sa mayor ang kamahinungdanon sa hugot nga border control aron mapanalipdan ang komunidad batok sa iligal nga drogas.
I via Renante Socia Lada