Sa programa nga Tandem Express sa RPN DYKC Cebu, gihisgutan ni Ysabelle Noel, Social Officer II, ug ni Cheina Maderazo, PIO, ang Foster Care Program sa Regional Alternative Child Care Office VII (RACCO-7). Karong Marso 6, 2026.
Ang programa nagtumong sa paghatag og temporaryong pag-atiman sa mga bata nga nanginahanglan og pamilya, ilabi na kadtong gipahawa sa ilang pamilya tungod sa peligro sa ilang kaluwasan, neglect, o uban pang sitwasyon nga delikado sa ilang kaayohan. Ang tumong sa programa mao ang paghatag og lig-on nga suporta sa bata samtang nagpaabot og mas permanenteng solusyon sama sa reunification sa pamilya o adoption.
Gipasabot usab sa mga besita nga ang programa bukas para sa bisan kinsa nga indibidwal o couples nga gustong mahimong licensed foster parent. Ang mga interesado kinahanglan moagi sa usa ka comprehensive assessment, lakip ang background check, home visit, ug pag-apil sa orientation ug training sa foster care. Dili kinahanglan nga minyo ang mag-apply; pwede usab ang single individual basta andam sa responsibilidad sa pag-atiman sa bata ug sa pagtuman sa mga regulasyon sa programa.
Ang mga bata nga gihatagan og foster care mao kadtong temporarily removed sa ilang pamilya tungod sa peligro sa kahimtang sa ilang kinabuhi o kaluwasan, sama sa abuso, neglect, o ubang emergency cases. Ang pag-atiman sa foster parents temporaryo ra, hangtod nga ang bata mahimong i-reunite sa pamilya, mahatagan og legal nga guardian, o i-consider para sa adoption. Ang foster parents makadawat usab og financial assistance o support, lakip ang allowance para sa pagkaon, edukasyon, medisina, ug uban pang panginahanglan sa bata.
Para sa mga gustong mahimong foster parent, ang proseso naglakip sa application, interview, home assessment, ug pagkuha sa lisensya gikan sa RACCO-7. Ang mga foster parents adunay daghang responsibilidad, lakip ang pag-atiman sa kaluwasan ug kahimsog sa bata, pagtudlo og maayong pamatasan, pagtabang sa edukasyon ug psychosocial needs, ug pagsunod sa mga polisiya ug giya sa foster care program. Ang programa usa ka pamaagi aron masiguro nga ang mga bata makasinati og temporaryong pamilya nga suporta samtang gi-address ang ilang long-term needs.
Ang mga interesado sa programa mahimong moadto sa opisina sa RACCO-7 sa Cebu o kontakon ang hotline aron makakuha og dugang impormasyon ug magpa-register. Gi-awhag sa RACCO-7 nga ang Foster Care Program usa ka mahinungdanong lakang sa proteksyon sa bata, ug ang pag-apil niini dili lang nagtabang sa bata, apan nagpalig-on usab sa komunidad pinaagi sa paghatag og lig-on nga suporta sa mga kabataan nga nanginahanglan sa ilang pag-atiman.
Source: RACCO-7
I via Renante Socia Lada ug TJP
RPN DYKC CEBU