Pormal nga gilusad kagahapong adlawa, Agusto 20, 2024, ang usa ka espesyal nga proyekto sa Philippine Statistics Authority (PSA) dinhi sa dakbayan sa Sugbo nga gitawag og Birth Registration Assistance Project”.
Una kining higayon nga gilusad kining maong proyekto dinhi sa dakbayan sa Sugbo sukad kini gipatuman PSA lukop nasud niadtong uwahing bahin sa 2022. Usa ka memorandum of agreement ang gipirmahan tali sa PSA ug sa Cebu City Government alang niining proyekto, hain libre nga makaparehistro sa PSA kadtong kabus nga mga lumolupyo sa dakbayan.
Gitambongan mismo ni Acting Mayor Raymond Alvin Garcia ug City Registrar Evangeline Abatayo, uban sa mga opisyal sa PSA, ang paglusad sa sa programa sa City Hall karong udto. “This is a very noble undertaking para kanatong tanan, ilabi na sa atong mga kaigsoonan nga wala kahibawo sa ilang mga katungod isip mga lumolupyo dinhi sa atong syudad,” sulti ni Acting Mayor Garcia. Pinaagi sa pakigtambayayong sa Philippine Commission of Indigenous Peoples ug sa Cebu City Local Civil Registrar, mokabat sa 27 ka mga lumolupyo sa siyudad, hain sagad kanila mga Badjao, ang unang mga beneficiary sa libre nga registration sa maong programa.
Sa usa ka yanong seremonyas karong udto, gitunol gilayon ngadto kanila ang ilang mga birth certificate. (Renante Socia Lada)
(Source: Cebu City PIO)