Nagpadayon karon ang gihimo nga imbestigasyon sa nahitabong pagkamatay sa gatusan ka mga binuhing baboy didto sa lungsod sa Medellin, probinsya sa Sugbo.
Sugod kini niadtong Agosto 1 ngadto na sa Agosto 19, 2024, diin nikabat ngadto sa 657 ka mga binuhing baboy ang nangamatay ug gibanabanang mokabat sa P2 milyones ka pesos ang danyos niini.
Pito sa 19 ka mga Barangay ug 85 ka mga hog raisers sa lungsod sa Medellin ang apektado sa pagkamatay sa mga binuhing baboy.
Matod pa sa Municipal Agriculturist nga si Ruben Noynay, nga tungod sa dili maayong kondisyon sa panahon maoy nag-unang hinungdan sa pagkamatay sa mga baboy.
Dugang pa ni Noynay nga niadtong Agosto 19 daghan ang nangamatay tungod sa hilanat sa baboy.
Ang pito ka mga Barangay nga apektado mao ang Barangay Kawit, Barangay Antipolo, Barangay Poblacion, Barangay Maharuhay, Barangay Dayhagon, Barangay Mahawak, ug Barangay Lamintak Norte. Hinuon giklaro sa Cebu Provincial Veterinarian nga ang pagkamatay sa mga baboy walay kalambigitan sa African swine fever (ASF). (Renante Lada and Ting Joe Pepito)