Palig-onon sa Kapitolyo sa Lalawigan sa Cebu ang suporta para sa mga solo parent human aprobahan sa 17th Sangguniang Panlalawigan ang usa ka ordinansa nga magtukod og espesyal nga opisina para kanila. Tumong niini nga matuman gyud ang Republic Act No. 8972 o ang Solo Parents’ Welfare Act of 2000.
Ang ordinansa gisulat ni Provincial Board Member Nilo Seno ug kauban nga mga co-author si Board Member Lakambini Reluya ug Paz Rozgoni. Kini gitawag og “Cebu Province Solo Parents Affairs Office Ordinance” o CP-SPAO Ordinance.
Pinaagi sa ordinansa, matukod ang Cebu Province Solo Parents Affairs Office (CP-SPAO) ilalom sa Provincial Social Welfare and Development Office (PSWDO) ug diretso nga bantayan sa Gobernador sa Lalawigan sa Cebu.
Gisulti sa ordinansa nga daghang solo parents ang wala pa kahibalo sa ilang mga benepisyo ug katungod ubos sa balaod tungod kay dugay na kini nga wala gyud mapatuman pag-ayo sukad gipalabang niadtong 2000. Usa sa rason mao ang kakulang sa klaro ug lig-on nga ahensya nga motutok sa ilang kahimtangan.
Sumala sa datos sa PSWDO sa 2024, adunay 18,486 ka rehistradong solo parents sa tibuok lalawigan sa Cebu, busa nakita ang dakong panginahanglan sa usa ka opisina nga moatiman sa ilang mga panginahanglan ug mosuporta sa ilang mga katungod.
Gilauman nga pinaagi sa CP-SPAO, mas dali mahatagan og tabang ang mga solo parents, matangtang ang diskriminasyon batok kanila, ug adunay klaro nga opisina nga modumala ug modipensa sa ilang interes.
Ang ordinansa usab nagsunod sa Republic Act No. 11861, nga nagpalig-on ug nagpalapad sa benepisyo sa mga solo parents ug sa ilang mga anak, nga napirmahan kaniadtong Hunyo 4, 2022.
Pinaagi niini nga lakang, gipakita sa Kapitolyo sa Lalawigan sa Cebu ang ilang padayon nga paningkamot sa makiangayon ug inklusibong pangdumala alang sa tanang solo parents sa probinsya.
Source: Cebu Province PIP
I via Renante Socia Lada