Sa pagsaulog sa Fiesta sa Señor Santo Niño, miabli ang Museo Sugbo og usa ka espesyal nga devotional exhibit nga nagpasidungog sa Santo Niño ug sa halawom nga pagtuo sa mga Sugboanon.
Gipangulohan ni Governor Pamela Baricuatro ang pormal nga pag-abli sa exhibit niadtong Sabado, Enero 10, kauban ang head curator sa Museo Sugbo nga si Francis Pesons ug ang mga opisyal ug miyembro sa The Heritage of Faith Museum.
Ang exhibit nga giulohan “Sa Daang Tao Palangga (By Our Forebears Loved): Devotions to the Sto. Niño in Cebu” nagpakita sa nagkalain-laing mga tradisyon ug paagi sa debosyon sa mga lungsod ug dakbayan sa lalawigan sa Cebu sa pagsaulog sa pista sa Santo Niño.
Matod ni Governor Baricuatro, ang exhibit naghulagway sa pagtuo nga hinay ug matinud-anong gipapuyo sa daghang henerasyon sa mga Sugboanon, nga gibantayan sa mga panimalay, simbahan ug kapilya, ug gidala sa kasingkasing sa matag Sugboanon.
Giingon usab niya nga ang debosyon sa Santo Niño labaw pa sa tradisyon, kundili kusog sa lisod nga panahon, pahinumdom sa pagpaubos sa kalampusan, ug giya sa paghigugma ug pag-alagad sa isigkatawo.
Samtang, matod ni Margarita Garcia-Sarmiento, chairperson sa The Heritage of Faith Museum, ang Sinulog dili lang pista kundi buhi nga handumanan sa espiritu, pagtuo, kalig-on ug kalipay sa mga Sugboanon.
Gipanalanginan ang exhibit area ni Rev. Fr. Brian Brigoli, chairperson sa Cebu Archdiocesan Commission for the Cultural Heritage of the Church.
Sumala ni Pesons, abri sa publiko ang exhibit sugod Enero 13 hangtod Pebrero 13, gikan 9:00 sa buntag hangtod 4:00 sa hapon, matag Martes hangtod Sabado.
Makita sa exhibit ang mga debosyon gikan sa 11 ka lungsod ug duha ka dakbayan sa amihanang ug habagatan sa Cebu nga adunay kaugalingong pagsaulog sa pista sa Santo Niño.
Ang maong exhibit mao ang unang sunod-sunod nga mga show nga planong ipahigayon sa Museo Sugbo sa umaabot nga mga bulan.
Source: Cebu Province PIO
I via Renante Socia Lada