Tulo ka tawo ang nadakpan sa mga otoridad sa Police Regional Office 7 (PRO7) sa usa ka entrapment operation nga gihimo sa usa ka lodging house sa North Reclamation Area, Barangay Carreta, Cebu City. Ang operasyon may kalambigitan sa gipasanginlang ilegal nga aborsyon human makit-i ang lawas sa duha ka patay’ng fetus sa Liloan, Cebu niadtong Hunyo 13, 2025.
Ang entrapment operation gihimo pinaagi sa pakig-alayon sa RSPU7, RID7, CMFC Cebu City, ug Mabolo Police Station. Nakuha gikan sa mga suspek ang mga butang nga gituhuang gigamit sa aborsyon sama sa Cytotec tablets, antibiotics, surgical tools, gloves, tuwalya, lubricant, antiseptic, flashlight, ug marked money.
Sumala sa Article 256 sa Revised Penal Code, ang tinuyong aborsyon usa ka seryoso nga krimen nga nagsilot og 6 hangtod 12 ka tuig nga pagkabilanggo, depende sa paagi sa pagbuhat niini. Ang mga suspetsado karon gitanggong sa RSPU ug giandam na ang kaso nga ipasaka batok kanila.
Nagpadayon ang imbestigasyon aron masuta kung kabahin ba ang mga suspek sa mas dako nga grupo o sindikato. Gitan-aw usab kung nakahibalo ba ang tag-iya sa establisemento sa ilegal nga kalihokan. Kung mapamatud-an, posible nga pasakaan og kaso ang tag-iya ug ipasirado ang maong negosyo.
Nanawagan si PBGEN Redrico A. Maranan, Regional Director sa PRO7, sa mga posible pang biktima sa grupo:
“Nananawagan tayo doon sa mga naging biktima nitong sindikato na ito at nang grupo na ito na to come out in the open. Makipag-ugnayan tayo sa Cebu City Police Office. Kung sa tingin ninyo ay na-violate ang inyong karapatan o kayo ay naging biktima ng grupong ito, you can come out and file a complaint against these people.”
Gipasabot usab ni Maranan nga kini nga operasyon uyon sa mando ni PNP Chief PGEN Nicolas D. Torre III nga paspasan ang pagtubag sa mga tawo sa Central Visayas.
Source: PRO7
I via Renante Socia Lada