Padayon ang koordinasyon sa lain-laing ahensya aron masiguro ang kaluwasan ug kahapsay sa 461st Fiesta Señor ug Sinulog Festival 2026.
Gipangunahan ni PRO7 Regional Director PBGen Redrico A. Maranan ang inter-agency coordinating meeting niadtong Disyembre 26, 2025 sa Camp Sergio Osmeña, Sr., Cebu City.
Mitambong sa maong tigom ang mga nag-unang sektor sa seguridad ug suporta sama sa Philippine National Police, Armed Forces of the Philippines, Philippine Coast Guard, Bureau of Fire Protection, Cebu City Government, Sinulog Foundation, uban pang ahensya sa gobyerno, lokal nga pangagamhanan, ug mga stakeholder.
Gihisgutan sa tigom ang pagpalig-on sa koordinasyon tali sa mga ahensya, pag-ayo sa plano sa seguridad ug contingency plans, paghiusa sa traffic ug crowd management, pag-andam sa emergency response, ug pagpalig-on sa pagpaambit sa impormasyon aron masiguro ang kaluwasan sa tanan atol sa pista.
Matod ni PBGen Maranan, importante kaayo ang padayon nga panaghiusa ug koordinasyon sa tanang ahensya. Giingon niya nga pinaagi sa kanunay nga tigom ug pagtinabangay, masiguro nga andam ang tanang pamaagi sa seguridad alang sa kaluwasan sa mga deboto, turista, ug sa kinatibuk-ang publiko atol sa Sinulog Festival 2026.
Gipadayag usab sa PRO7 ang ilang hugot nga paningkamot sa usa ka whole-of-government ug whole-of-community approach, diin ang kanunay nga koordinasyon, ka-andam, ug kooperasyon maoy yawe sa pagmintinar sa kalinaw ug kahapsay sa Sinulog Festival 2026.
Source: PRO7 PIO
I via Renante Socia Lada