Ang Police Regional Office 7 (PRO7) nagpahayag sa tibuok nilang pagsuporta sa panawagan sa Cebu Provincial Government nga magtinabangay ug maghi-usa sa paghatod sa tabang ngadto sa mga komunidad nga naapektuhan sa linog sa amihanan nga bahin sa Cebu.
Matod ni PBGen Redrico A. Maranan, Regional Director sa PRO7, nga ang tumong sa panawagan dili aron pugngan ang mga gusto motabang, apan aron masiguro ang kaluwasan sa tanan ug aron ang tabang mahatod sa hustong paagi ug sa mga lugar nga pinakakinahanglan.
“We deeply appreciate the generosity and volunteerism of our fellow Cebuanos and partners. The call for coordination is simply to make sure help is delivered safely. The North isn’t fully safe yet—aftershocks can still occur. Your safety remains our top priority,” segon ni PBGen Maranan.
Gipasabot usab niya nga ang pahimangno sa PRO7 nga malikayan ang tagsa-tagsa o dili koordinado nga relief trips nagtinguha aron malikayan ang trapik ug kalangan sa mga kalsada. Pinaagi sa usa ka hiniusa ug tinabangay nga lihok, mas dali ug mas luwas nga makalusot ang mga responders ug relief teams.
Giingon pa ni Maranan nga ang sentralisadong koordinasyon dili nagpasabot nga dili na pwede motabang ang pribado o boluntaryo nga grupo.
“Centralized coordination doesn’t mean you can’t go there. We just encourage everyone to link up with other agencies and organizations so we can all work together efficiently,” dugang niya.
Si Gobernador Pam Baricuatro misang-at usab og panawagan sa mga donor ug grupo nga ipaagi sa opisyal nga mga dalan ang ilang mga donasyon aron mas mapadali ug mapalapad ang pag-abot sa tabang. Sa pagkakaron, padayon ang mga personahe sa PRO7 sa pagtabang sa relief coordination, seguridad sa kalsada, ug suporta sa mga komunidad uban sa lokal nga mga opisyal ug mga boluntaryo.
Source: PRO7- PIO