Usa ka dakong anti-drug operation ang nahitabo sa Barangay Pusok, diin usa ka drug suspek ang nadakpan uban ang 305 gramos nga gituohang shabu nga nagkantidad og Php2,074,000.00. Ang operasyon gipahigayon sa gabii sa Pebrero 18, 2025, sa usa sa mga parking area sa Sitio Upper Mustang, Siyudad sa Lapu-Lapu.
Sumala sa kapulisan, usa ka buwan nga surveillance ug intelligence monitoring ang ilang gihimo human makadawat og impormasyon nga nagdugtong sa suspek sa iligal nga negosyo sa ginadiling drugas.
Ang operasyon gipangunahan sa City Intelligence Unit, City Drug Enforcement Unit, ug Mobile Patrol Unit sa Lapu-Lapu City Police Office (LCPO), nga nakasakmit usab og drug paraphernalia ug ubang ebidensya.
Matod ni Regional Director Police Brigadier General Redrico Atienza Maranan, ang ilang padayon nga operasyon batok sa iligal nga drogas nagpakita sa ilang dedikasyon sa pagpabiling malinawon ug luwas ang rehiyon.
“Through strategic law enforcement operations, intelligence-driven initiatives, and strengthened community partnerships, we continue to make significant strides in maintaining peace and order. The recent successful arrest and drug seizure demonstrates our dedication to eradicating the drug menace in the region”, segon ni Regional Director Police Brigadier General Redrico Atienza Maranan.
Ang suspek kasamtangang gipreso sa LCPO Headquarters, samtang giandam na ang mga dokumento alang sa pagsang-at og kaso ilawom sa Republic Act 9165 o Comprehensive Dangerous Drugs Act of 2002. Ang nakuhang mga ebidensya ipadala usab sa Regional Forensic Unit 7 alang sa dugang nga imbestigasyon.
Source: PRO7-PIO
I via Renante Socia Lada