Niining nagkadool na ang nasyonal ug lokal nga eleksyon, ang Police Regional Office 7 (PRO7) nagpalig-on sa ilang kampanya batok sa mga walay rehistradong armas, aron maseguro ang hapsay ug luwas nga eleksyon sa Central Visayas.
Sa ilang aktibong estratehiya, ang kapulisan nagpunting sa pagpangita ug pagsakmit sa ilegal nga armas aron mapanalipdan ang kasiguruhan ug integridad sa eleksyon. Sumala sa PRO7, kini nga inisyatiba nagpakita sa ilang dedikasyon sa pagpugong sa kasamok nga mahitabo atol sa eleksyon.
Gikan sa Enero 1 hangtod 31, 2025, nakasakmit ang PRO7 og 430 ka loose firearms ug 10 ka eksplosibo, diin 117 ka indibidwal ang nadakpan sulod sa 410 ka operasyon. Ang Katok Program nakapadani sa 22 ka pusil nga boluntaryong gisurender, samtang Kontra Boga Operations nakaresulta sa pagsakmit sa 408 ka armas.
Si PRO7 Regional Director PBGen Redrico Maranan mipadayag nga kini nga kampanya usa ka lakang aron mapugngan ang kadaot ug pagpanghulga sa eleksyon. Giawhag usab niya ang pagdugang sa presensya sa kapulisan ug checkpoints aron mapaambit sa publiko ang importansya sa responsable nga pagpanag-iya sa pusil ug pagsunod sa balaod sa armas.
Sukad sa iyang paglingkod sa katungdanan niadtong milabay nga buwan, si PBGen Maranan mipalig-on sa siguridad alang sa umaabot nga midterm elections, nga nagtumong sa kalinaw ug kahapsay sa proseso sa eleksyon.
“We stand together with our nation in the pursuit of zero election-related incidents, and we need your cooperation and vigilance. By staying alert, we can protect the integrity of our democracy and honor the values we hold as citizens of this country,” segon ni PBGen. Maranan.
Giawhag sa PRO7 ang publiko nga aktibong moapil sa ilang kampanya pinaagi sa pagreport sa mga kadudahang lihok aron masiguro nga walay mahitabo nga krimen nga may kalabotan sa pusil, ug magpabilin ang kasiguruhan sa katawhan.
Source: PRO7-PIO
I via Renante Socia Lada