Mikabat og ₱4 milyon ang kantidad sa shabu nga nasakmit ug 33 ka drug suspek ang nadakpan sa gipahigayon nga 26 ka anti-illegal drug operations sa Police Regional Office 7 (PRO7) sulod lamang sa usa ka adlaw, Agosto 21, 2025, sa tibuok Central Visayas.
Ang pinakadakong operasyon nahitabo alas 10:14 sa gabii sa Sitio Estampar, Barangay Santa Cruz, San Francisco, Cebu. Nagkahiusa ang Provincial Intelligence Unit/Provincial Drug Enforcement Unit sa Cebu Police Provincial Office (CPPO), Philippine Drug Enforcement Agency (PDEA) 7, ug San Francisco Municipal Police Station sa usa ka buy-bust operation nga midala ngadto sa pagkadakop sa duha ka iladong suspek.
Ang nadakpan mao ang 40-anyos nga lalaki gikan sa Tudela, Cebu, ug 22-anyos nga lalaki gikan sa San Francisco, Cebu. Narekober gikan nila ang 515 ka heat-sealed transparent plastic sachets nga adunay sulod nga shabu nga gibanabana og kantidad nga ₱3,502,000.
Lakip sa mga nadakpan ang usa ka “high-value target” nga giingong distributor sa shabu sa isla ug iyang kasaligan nga kauban. Ang mga nasakmit nga drogas gipasumiter sa Regional Forensic Unit 7, samtang ang mga suspek temporaryo nga gibutang sa custodial facility sa San Francisco MPS, CPPO. Giandam na usab ang kasong ipasaka batok kanila ubos sa Republic Act 9165 o Comprehensive Dangerous Drugs Act of 2002.
Gidayeg ni Police Brigadier General Redrico A. Maranan, Regional Director sa PRO7, ang nasangpit nga operasyon ug giila kini nga ebidensya sa kusganong kampanya batok droga sa rehiyon.
“Ang serye ng mga matagumpay na operasyong ito ay patunay ng pinaigting na kampanya ng PRO7 laban sa ilegal na droga dito sa Central Visayas. Katuwang ang PDEA at iba pang ahensya ng pamahalaan, hindi kami titigil sa pagtugis sa mga sindikato at pusher. Sa paggabay ng ating Chief PNP, PGEN Nicolas D Torre III, patuloy tayong magsusumikap upang matiyak ang mas ligtas at drug-free na mga pamayanan para sa ating mga kababayan,” segon ni PBGEN Maranan.
Source: PRO7- PIO
I via Renante Socia Lada