Nakadakop og 569 ka wanted persons ang Police Regional Office 7 (PRO7) atol sa ilang gipakusog nga manhunt operations sa tibuok Central Visayas niadtong bulan sa Pebrero 2026.
Sumala sa PRO7, padayon nilang gipatuman ang mga warrant of arrest nga miresulta sa pagdakop sa daghang mga tawo nga giapangita sa balaod.
Sa kinatibuk-ang gidakop, 104 ang giila nga Most Wanted Persons (MWPs) o kadtong anaa sa Most Wanted list tungod sa kabug-aton sa ilang mga kaso. Lakip niini ang pito ka Regional Most Wanted Persons nga giuna gyud og dakop tungod sa seryosong mga sala nga giingong ilang nahimo.
Samtang 465 usab ang Other Wanted Persons (OWPs) o kadtong adunay aktibong warrant of arrest gikan sa korte apan wala maapil sa opisyal nga Most Wanted list.
Sumala ni PBGen. Redrico A. Maranan, Regional Director sa PRO7, ang maong kalampusan nagpakita sa ilang lig-on nga paningkamot sa pagpangita ug pagdakop sa mga naglikay sa hustisya.
Matud pa niya, padayon ang ilang intelligence monitoring ug koordinasyon sa mga lokal nga police units aron dali nga mahibaw-an ug madakpan ang mga wanted persons.
Nanawagan usab ang PRO7 sa publiko nga magpadayon sa paghatag og impormasyon sa mga awtoridad aron matabangan ang kapulisan sa pagmintinar sa kalinaw ug kahapsay sa Central Visayas.
Source: PRO7 PIO
I via Renante Socia Lada