Gipasidunggan sa Police Regional Office 7 o PRO7 ang ilang mga babayeng personnel isip kabahin sa pagtapos sa selebrasyon sa National Women’s Month nga gihimo atol sa flag raising ceremony sa Camp Sergio Osmeña Sr. sa Cebu City niadtong Marso 30, 2026.
Ang maong kalihokan gitambongan ni Mrs. Ebeneza Maranan isip guest of honor.
Atol sa seremonya, gihatagan og Plaque of Recognition ang mga babayeng pulis gikan sa headquarters ug lain-laing unit sa PRO7 tungod sa ilang maayong serbisyo, kaisog, ug dedikasyon sa ilang trabaho.
Giila ang mga awardee tungod sa ilang pagpanguna bisan sa lisod nga sitwasyon, pagpaningkamot nga molabaw pa sa gikinahanglan, ug pagserbisyo nga adunay integridad ug kasingkasing.
Sa iyang mensahe, gipadayag ni Maranan ang iyang dako nga pagrespeto ug pagdayeg sa mga babaye sa kapulisan, nga matod pa niya, nagpakita og kusog, kalooy, ug dedikasyon sa ilang katungdanan.
Human sa iyang pakigpulong, gihatagan usab siya og plaque of recognition isip pasalamat sa iyang padayon nga suporta sa kapulisan.
Samtang, si PBGEN. Redrico A. Maranan, Regional Director sa PRO7, mipasalamat sa presensya ni Maranan ug mipahalipay sa mga awardee tungod sa ilang maayong kontribusyon sa organisasyon.
Ang kalihokan maoy nahimong angay nga pagtapos sa Women’s Month celebration sa PRO7, nga nagpakita sa importante nga papel sa kababayen-an sa pagmintinar sa kalinaw, kahapsay, ug kaluwasan sa Central Visayas.
Source: PRO7 PIO
I via Renante Socia Lada