Nagpalig-on na sa ilang mga preparasyon ang Police Regional Office 7 (PRO7) alang sa umaabot nga Semana Santa 2026 pinaagi sa pagpahigayon og coordinating conference kagahapon Marso 27, 2026 sa Camp Sergio Osmeña Sr. sa Cebu City.
Ang maong tigum gipangulohan ni PBGen Redrico A. Maranan uban sa mga miyembro sa Command Group, regional staff, ug mga provincial ug city directors sa tibuok Central Visayas.
Tumong sa miting ang pag-review ug pagpaayo sa kasamtangang security plan sa PRO7 aron maseguro nga andam ang kapulisan sa posibleng pagdagsa sa mga biyahero ug deboto panahon sa Semana Santa. Gi-assess usab ang kahimtang sa mga lugar nga daghang tawo sama sa mga simbahan, terminal, tourist spots, ug mga dagkong kalsada sa rehiyon.
Gipasiugda ni PBGen Maranan ang kamahinungdanon sa lig-on nga koordinasyon ug ka-andam sa mga police commander aron masiguro ang hapsay ug epektibong implementasyon sa seguridad.
Sumala sa PRO7, nakapahimutang na sila og unang deployment sa kapulisan sa mga importanteng lugar, ug dugangan pa kini sa umaabot nga mga adlaw samtang mosaka ang alert level tungod sa kadaghan sa lihok sa publiko ug relihiyosong kalihokan.
Gisiguro usab ni Maranan nga padayon ang ilang paningkamot sa pagpanalipod sa katawhan.
Miingon siya nga buhaton sa kapulisan ang tanang pamaagi aron masiguro nga malinawon, luwas, ug han-ay ang selebrasyon sa Semana Santa karong tuiga.
Gihangyo usab niya ang publiko nga magtinabangay ug magmatngon aron mapadayon ang kalinaw ug kahapsay sa tibuok rehiyon.
Padayon usab ang koordinasyon sa PRO7 uban sa mga lokal nga kagamhanan, emergency response agencies, ug uban pang sektor aron maseguro ang luwas ug malinawon nga pag-obserbar sa Semana Santa sa Central Visayas.
Source: PRO7 PIO
I via Renante Socia Lada