Naghiusa ang Police Regional Office 7 (PRO7) ug ang Regional Advisory Group for Police Transformation and Development (RAGPTD) 7 aron makatigom og pondo alang sa pagpalit og ikaduhang fully-equipped mobile command vehicle. Gisugdan kini pinaagi sa upat ka adlaw nga RD’s Cup nga giablihan karong Hulyo 17 sa Cebu Wonderland Shooting Range sa Barangay Agus, Lapu-Lapu City.
Ang seremonya sa pag-abli gipangulohan ni PRO7 Regional Director PBGEN Arnold E. Abad, uban ni Lapu-Lapu City Mayor Ma. Cynthia “Cindi” King-Chan, RAGPTD 7 Chairman Eric Mendoza, ug PRO8 Regional Director PBGEN Jason L. Capoy. Mitambong usab ang mga representante sa lain-laing police units, mga sponsor, ug mga partner sa gobyerno ug pribadong sektor.
Ang fundraising activity nagtumong sa pagpalit og mobile command vehicle nga nagkantidad og ₱6.67 milyon. Kini adunay CCTV system, public address system, ICT equipment, conference area, comfort room, ug uban pang pasilidad nga magamit isip mobile command center panahon sa dagkong operasyon, kalamidad, ug emerhensiya aron magpadayon ang komunikasyon ug koordinasyon sa kapulisan.
Sumala ni PBGEN Abad, dako ang iyang pasalamat sa RAGPTD 7, mga sponsor, donors, ug tanang partner nga misuporta sa proyekto. Matod niya, ang maong mobile command vehicle makatabang sa pagpalig-on sa serbisyo sa PRO7 ug masiguro nga padayon ang operasyon sa kapulisan bisan pa sa panahon sa mga kalamidad, isip kabahin sa kampanya sa “Bagong PNP Para sa Bagong Pilipinas: Serbisyong Mabilis, Tapat, at Nararamdaman.”
📸 PRO7
I via Renante Socia Lada