Mas gipakusgan pa sa Police Regional Office 7 (PRO7) ang ilang kampanya batok sa iligal nga drogas atol sa unang tunga-tunga sa tuig 2025. Kini nga kalihukan nagtuman sa mando ni Chief PNP PGen Nicolas D. Torre III nga siguruhon ang kalinaw, kahapsay, ug kasigurohan sa mga komunidad sa Central Visayas.
Sukad Hulyo 1 hangtod 31, 2025, nakahimo ang PRO7 og 766 ka operasyon batok sa iligal nga drogas. Gikan niini, nadakpan ang 896 ka drug suspects ug nasakmit ang 15,836.61 ka gramos sa shabu nga nagkantidad og ₱107.6 milyon. Apil usab sa nakuha ang mga tanom nga marijuana nga gibanabanang nagkantidad og ₱34,564.
Gipadayag ni Police Brigadier General Redrico Atienza Maranan, Regional Director sa PRO7, ang iyang pagpasalamat sa tanang sakop sa kapulisan sa rehiyon nga walay hunong sa serbisyo. Matod pa niya, kini usa ka klaro nga pasidaan sa mga nalambigit sa drogas nga walay luwas nga dapit para nila sa Central Visayas.
Dugang ni Gen. Maranan nga magpadayon ang PRO7 sa pagpalig-on sa operasyon, pagpalalom sa intelihensya, ug pagpakusog sa kooperasyon sa mga komunidad. Gipangandoy sa PRO7 nga limpyohan sa drogas ang kadalanan ug masiguro ang luwas nga palibot alang sa tanan.
Gihangyo sa PRO7 ang publiko nga magpabilin nga mapanabot ug motabang sa kapulisan pinaagi sa pagreport sa mga kalihukan sa drogas. Pinaagi sa panaghiusa sa katawhan ug kapulisan, posible ang usa ka Central Visayas nga gawasnon sa drogas ug lig-on ang seguridad.
Source: PRO7
I via Renante Socia Lada