Gipasirado ang usa ka drug den ug upat (4) ka indibidwal ang nadakpan atol sa usa ka buy-bust operation nga gihimo sa Philippine Drug Enforcement Agency (PDEA) ug sa kapulisan sa Barangay Poblacion, Lapu-Lapu City niadtong Agosto 4, 2025.
Nasakmit sa mga otoridad ang iligal nga kalihokan sulod sa maong drug den, nga giingong duol lang sa kasilinganan ug posible pa nga dugay nang naglihok. Gipasakaan na og kaso ang mga suspetsado ug kasamtangang gidetiner.
Ang pagpahimutang ug pagdumala og drug den dunay silot nga life imprisonment ug multa nga moabot sa ₱500,000 hangtod ₱10 milyon. Ang pagsulod o pagbisita sa usa ka drug den, bisan dili regular, aduna say silot nga 12 tuig ug 1 ka adlaw hangtod 20 ka tuig nga pagkabilanggo ug multa nga gikan ₱100,000 hangtod ₱500,000.
Nagpahimangno ang PDEA sa publiko nga padayon ang ilang kampanya batok sa iligal nga drogas, ug gi-awhag ang tanan nga makigtambayayong sa pagpahibalo sa mga kahimtang nga sama niini.
Source: PDEA-7
I via Renante Socia Lada