Ang Police Regional Office 8 (PRO-8) nakapasaka na og kaso batok sa usa ka 15-anyos nga menor de edad nga giila isip Child in Conflict with the Law (CICL) may kalabotan sa pagpamusil sulod sa San Jose National High School sa Tacloban City niadtong Hunyo 22, 2026, nga miresulta sa tulo ka patay ug daghang samaran.
Sumala sa PRO-8, ang kaso gipasaka pinaagi sa inquest proceedings sa Office of the City Prosecutor sa Tacloban City ug nadawat kagahapon Hunyo 23, 2026. Ang mga kaso naglakip sa tulo ka ihap sa murder, tulo ka ihap sa frustrated murder, ug dugang nga kaso sa serious physical injuries.
Ang duha ka menor de edad nga nalambigit anaa karon sa kustodiya sa Department of Social Welfare and Development (DSWD) Regional Rehabilitation Center for Youth (RRCY) sa Tanauan, Leyte. Didto sila gipaagi sa hustong legal nga proseso ug angay nga intervention sumala sa balaod para sa CICL.
Si PBGEN Jason L. Capoy, Regional Director sa PRO-8, miingon nga ang imbestigasyon padayon nga gihimo uban ang hustisya, patas nga proseso, ug pagrespeto sa balaod. Giingon usab niya nga importante nga magpabilin kalma ang publiko samtang nagpadayon ang imbestigasyon.
Giawhag sa PRO-8 ang publiko nga dili dayon motuo sa mga walay kumpirmadong impormasyon ug magreport sa mga awtoridad kung adunay kadudahang panghitabo. Padayon usab sila sa pagpaningkamot aron maestablisar ang tinuod nga hitabo ug masiguro ang hustisya.
I via Renante Socia Lada