Ang Police Regional Office (PRO-7) mipahibalo nga nagsugod na ang pagpatuman sa COMELEC Gun Ban sugod Enero 12, 2025, tungod sa pagsugod sa election period alang sa Mayo 12, 2025 National ug Local Elections.
Sa pakig-alayon sa Commission on Elections (COMELEC), ang PRO-7 nakig-uban sa usa ka nasudnong kalihokan alang sa paglusad sa mga COMELEC checkpoint nga gihimo kagahapong adlawa sa Cebu Daily News Building, Sergio Osmeña Blvd., Siyudad sa Sugbo.
Si PBGEN Redrico Atienza Maranan, Regional Director sa PRO-7, misaysay sa kalabutan ug pagpatuman sa mga checkpoint alang sa public safety atol sa election period.
Matod niya, gipahinomdoman ang tanan nga sila ra nga otorisadong personahe gikan sa Philippine National Police, Armed Forces of the Philippines, ug uban pang law enforcement agencies ang gitugutan nga magdala ug armas atol sa gun ban.
“Our goal is to achieve zero gun-related incidents during the midterm elections. We are ready for safe, secure, and orderly 2025 National and Local Elections,” segon ni PBGen Maranan.
Gihangyo usab niya ang publiko nga magtinabangay ug magpakita ug kooperasyon atol sa simultaneous checkpoints nga gihimo sa mga kapulisan ug COMELEC.
Kini nga inisyatiba nagsilbing dakong hagit aron mapatuman ang gun ban ug makab-ot ang luwas ug malinawon nga palibot alang sa tanan. (Renante Socia Lada)
(Source: PRO-7 PIO)