Nadakpan ang 78 ka drug suspek ug nasakmit ang ₱2.9 milyon nga kantidad sa gituohang shabu human sa 24-oras nga sunod-sunod nga operasyon batok ilegal nga drogas nga gipahigayon sa Police Regional Office 7 (PRO7) gikan alas 6:00 sa buntag sa Hunyo 27 hangtod alas 5:59 sa buntag sa Hunyo 28, 2025.
Sa maong panahon, 59 ka operasyon ang gihimo sa tibuok rehiyon nga misangpot sa pagkasakmit sa 430.22 gramos nga shabu nga nagkantidad og ₱2,925,496.00.
Ang pinakadakong kuha sa operasyon nahitabo alas 4:55 sa buntag sa Hunyo 27 sa Sitio Middle Tabucanal, Barangay Poblacion, Pardo, Cebu City, diin usa ka high-value target ang nadakpan sa maong operasyon sa Police Station 7 sa Cebu City Police Office (CCPO), kauban ang City Intelligence Unit (CIU) ug Regional Intelligence Division (RID) sa PRO7.
Nasakmit gikan sa suspetsado ang 225 gramos nga shabu nga nagkantidad og ₱1.53 milyon.
Matod ni PBGen Redrico A. Maranan, Regional Director sa PRO7, dako ang iyang pasalamat sa tanang units nga nagtinabangay sa maong operasyon. Giingon niya nga ang ilang gipakusgang kampanya batok ilegal nga drogas usa ka paagi aron maprotektahan ang komunidad ug masiguro ang kalinaw sa rehiyon.
Ang tanang nadakpan pasakaan og kasong paglapas sa Republic Act 9165 o Comprehensive Dangerous Drugs Act of 2002.
Gihangyo usab sa PRO7 ang publiko nga motabang sa gubat batok ilegal nga drogas pinaagi sa pagreport sa mga kadudahang kalihokan sa labing duol nga estasyon sa kapulisan.
Source: PRO7
I via Renante Socia Lada