Nasikop dayon ang tulo ka suspetsado sa pagpanulis human sa usa ka tabang sa drone atol sa hot pursuit operation nga gihimo sa kapulisan sa Barangay Antipolo, Medellin, Cebu niadtong Hulyo 15, 2025.
Ang insidente nahitabo sa sayong kabuntagon sa usa ka pampublikong tunghaan diin gi-report sa security guard nga gigapos siya ug gitiunan og armas.
Gikumpirmar sa imbestigasyon nga nangabli og daghang classrooms ang mga suspetsado ug gidala ang kuwarta, mga gamit, ug ang serbisyo nga pusil sa guwardiya nga usa ka 9mm Armscor pistol.
Pagkahibalo sa insidente, gilusad dayon sa Medellin Police ug sa tropa sa Engineer Support “Achievers” Company sa 53rd Engineer Brigade sa Philippine Army ang usa ka operasyon nga gigamit ang drone. Sa wala pa moabot ang alas-1 sa hapon, nasikop ang tulo ka suspek ug narecover ang tulo ka armas, lakip na ang nawala nga pusil sa guwardiya.
Gipasidunggan ni Police Brigadier General Redrico A. Maranan, Regional Director sa PRO7, ang kusog ug paspas nga aksyon sa Medellin Police ug ang paggamit sa makabag-o nga teknolohiya sa ilang operasyon.
“This operation is a testament to how technology, especially drone surveillance, is transforming our capability to pursue criminals even in the most difficult terrains. As we modernize the PNP, we are committed to integrating innovative tools to enhance our response time, safety, and efficiency in every operation,” matod ni PBGen. Maranan.
Ang tulo ka nadakpan anaa karon sa kustodiya sa kapulisan, samtang padayon ang hot pursuit alang sa ika-upat nga suspek. Gisaad sa PRO7 nga padayon ang ilang paningkamot batok sa krimen gamit ang teknolohiya aron mapadayon ang kalinaw ug seguridad.
Source: PRO7
I via Renante Socia Lada