Mibisita si PRO7 Acting Regional Director PBGEN Arnold Evangelista Abad sa Cebu City Police Office o CCPO karong Mayo 27, 2026 isip kabahin sa pagtan-aw ug pagpalig-on sa kahimtang sa operasyon sa kapulisan sa Central Visayas.
Gihimo ang opisyal nga command visit sa Camp Sotero Cabahug sa Gorordo Avenue, Cebu City aron masusi ang kaandam sa CCPO sa pag-atubang sa mga isyu sa kalinaw ug kahapsay, lakip na ang ilang kagamitan, operasyon, ug serbisyo sa komunidad.
Atol sa maong kalihokan, gitunol usab ang mga ICT equipment ug mobility assets aron mas mapalig-on ang komunikasyon ug mas mapaspas ang pagresponde sa kapulisan sa mga insidente sa dakbayan.
Nitambong usab sa kalihokan sila Mayor Nestor Archival ug Konsehal Paul Labra II isip suporta sa padayon nga panagtambayayong tali sa lokal nga gobyerno ug kapulisan alang sa kalinaw ug kaluwasan sa katawhan.
Nagpahigayon usab si PBGEN Abad og command briefing ug pakighinabi sa mga opisyal sa CCPO aron hisgutan ang kahimtang sa krimen, anti-criminality operations, ug uban pang mga concern nga may kalabotan sa police services sa Cebu City.
Matod sa PRO7, ang maong pagbisita kabahin sa ilang padayon nga paningkamot aron maseguro nga andam ug kompleto sa kagamitan ang mga police unit sa rehiyon alang sa mas epektibo ug paspas nga serbisyo publiko.
I via Renante Socia Lada