Nadakpan ang 634 ka tawo atol sa padayong operasyon sa Safer Cities Initiative sa Cebu Police Provincial Office (CPPO) niadtong Mayo 26, 2026, tungod sa nagkadaiyang paglapas sa lokal nga ordinansa sa tibuok lalawigan sa Cebu.
Base sa report sa CPPO, adunay 234 ka operasyon nga gihimo gikan alas 12:01 sa kadlawon hangtod alas 11:59 sa gabii.
Ang operasyon kabahin sa Anti-Criminality Plan ug gipunting ang hugot nga pagpatuman sa mga lokal nga ordinansa subay sa mando sa Department of the Interior and Local Government o DILG.
Lakip sa mga gilapas nga ordinansa mao ang pag-inom ug pagpanigarilyo sa pampublikong lugar, paglakaw sa dalan nga hubo o halos hubo, mga menor de edad nga nakalapas sa curfew, sobra nga paggamit sa karaoke lampas sa gitugot nga oras, ug mga paglapas sa traffic ordinances sa siyudad ug lungsod.
Sa kinatibuk-an, 383 ka mga violator ang gipamulta samtang 251 ang gipasidan-an ug gipagawas. Miabot usab sa ₱157,250 ang nakolektang multa.
Aktibong miapil sa kampanya ang nagkadaiyang police stations sa lalawigan lakip ang Consolacion MPS, Carcar CPS, Naga CPS, Barili MPS, Daanbantayan MPS, Sibonga MPS ug Dumanjug MPS nga adunay dagkong nahimo sa operasyon.
Matud ni CPPO Provincial Director PCOL Abubakar Udang Mangelen Jr., importante ang padayon nga pagpatuman sa ordinansa aron malikayan ang krimen ug mapadayon ang kalinaw ug kahapsay sa komunidad.
Dugang pa niya, dili lang ang pagdakop sa mga violator ang tumong sa operasyon kondili ang pagdisiplina sa publiko ug pagpugong nga ang gagmayng paglapas mahimong mosangpot sa seryosong krimen.
Gidayeg usab ni PRO7 Regional Director PBGEN Arnold Evangelista Abad ang CPPO ug tanang operating units tungod sa ilang walay hunong nga kampanya batok sa kriminalidad. Matud niya, dako og tabang ang hugot nga pagpatuman sa ordinansa aron mapalambo ang disiplina ug seguridad sa komunidad sa Central Visayas.
Mipahayag usab og suporta si Cebu Governor Pamela S. Baricuatro sa maong kampanya ug gipasalamatan ang mga pulis sa ilang dedikasyon sa pagpanalipod sa katawhan.
Gipasalig sa CPPO nga ipadayon pa nila ang anti-criminality operations ug ordinance enforcement aron mapadayon ang kalinaw ug kahapsay sa tibuok probinsya sa Cebu.
I via Renante Socia Lada