Usa ka dakong kalampusan batok sa ilegal nga drogas ang nakab-ot sa Philippine Drug Enforcement Agency (PDEA) Region VII ug Philippine National Police (PNP) human nila gisunog ang kapin 80 ka kilo sa ginadiling drogas nga gibana-banang kantidad og ₱560 milyon niadtong Hunyo 5, 2025, sa usa ka thermal facility sa dakbayan sa Sugbo.
Sa maong gidaghanon, 70.32 ka kilo niini maoy shabu nga nagkantidad og ₱478,192,436.28, 3.4 ka kilo nga marijuana nga nagkantidad og ₱414,650.30, 15.7 ka milliliters nga nalbuphine hydrochloride nga nagkantidad og ₱3,140.00, ug 16 ka gramos nga ephedrine nga nagkantidad og ₱79,992.50. Kining mga drogas nasakmit atol sa mga high-impact anti-drug operations sa probinsya sa Sugbo ug Bohol.
Kini maoy labing daghang kantidad sa ilegal nga drogas nga giguba sa PDEA sukad pa sa tuig 2017, nga nagsilbing dakong kadaut sa operasyon sa drug trade sa Central Visayas.
Ang pagsunog sa mga ilegal nga drogas gibuhat ubos sa mga protocol sa Dangerous Drugs Board (DDB) ug gitambongan sa mga representante gikan sa Department of Justice (DOJ), Department of the Interior and Local Government (DILG), lokal nga panggamhanan, civil society organizations, ug media aron masiguro ang transparency ug public accountability.
Matod ni PBGen Redrico A. Maranan, Regional Director sa PRO7, nga ang maong operasyon maoy timaan sa padayon ug lig-on nga kampanya sa gobyerno aron tapuson ang hulga sa ilegal nga drogas ug mapanalipdan ang katawhang Pilipino.
Gipasidunggan usab ni Maranan ang kaisog ug dedikasyon sa mga sakop sa PRO7 ug ilang mga espesyal nga yunit, lakip na ang kooperasyon sa komunidad, sa pag-ila, pagsubay, ug pag-neutralize sa mga high-value targets sa droga.
Gipasiugda usab niya ang papel sa mga lokal nga panggamhanan ug Barangay Anti-Drug Abuse Councils (BADACs) sa pagsuporta sa national drug enforcement strategies pinaagi sa edukasyon, pagpugong, rehabilitasyon, ug partisipasyon sa katawhan gikan sa ubos.
Source: PRO7
I via Renante Socia Lada
#rpndykccebu