Nagpadayon ang lalawigan sa Cebu sa pagpalig-on sa iyang ngalan isip usa sa mga top nga destinasyon sa pagtuon og English alang sa mga langyaw nga estudyante.
Sa gilusad nga Grand International Familiarization Tour (FAM Tour) 2026 gala night niadtong Abril 24, gipakita ni Cebu Governor Pamela Baricuatro ang iyang lig-on nga suporta sa pagdani og dugang international students ug investors ngadto sa lalawigan.
Gitambongan ang maong kalihokan sa mga ahente ug opisyal sa ESL schools nga nag-atiman og mga estudyante gikan sa Southeast Asia, Middle East, ug Europe. Tumong sa maong event nga ipaila ang kusog nga sektor sa edukasyon sa Pilipinas ug ang kalidad sa pagtudlo sa English nga maka-kompetensya sa tibuok kalibutan.
Sumala sa gobernador, dugay nang nailhan ang Cebu isip maayo nga lugar para makat-on og English. Apan labaw pa niini, aduna usab kini’y dato nga kultura, nindot nga mga isla, ug mainiton nga pagdawat sa mga tawo.
Ang ESL o English as a Second Language nga mga eskwelahan nagtudlo sa pagbasa, pagsulat, pagpaminaw, ug pagsulti sa English alang sa adlaw-adlaw nga panginabuhi, trabaho, o pag-eskwela. Ang maong mga programa bukas sa tanang lebel sa kahibalo ug usahay adunay immersive o online nga pamaagi sa pagtuon.
Giawhag usab ni Baricuatro ang mga bisita nga sulayan ug masinati mismo ang Cebu, ug ipaambit ang ilang mga kasinatian sa uban pang posibleng estudyante ug partners sa ubang nasod.
Pinaagi sa mga inisyatiba sama sa FAM Tour, padayon nga giposisyon sa Cebu ang iyang kaugalingon isip sentro sa international education, nga nagdala og oportunidad sa turismo, kultura, ug ekonomiya.
Gipasabot sa gobernador nga magpadayon ang suporta sa gobyerno sa mga programa nga makatabang sa pagdani og global nga koneksyon ug mas daghang oportunidad alang sa mga Sugboanon.
Source: Cebu Province PIO
I via Renante Socia Lada